婚姻大事豈能兒戲。買鞋篇

21 May 2016 - Sat -

其實我都掙扎緊好唔好咁快寫呢個post

仲有N世耐先結婚，咁快就寫....如果中間有咩事結唔成婚咁咪好搞笑

但我又驚而家唔寫定，遲D一定斷片

開始Sem 3 & 4 時我就完全唔會理呢壇野，到時我又會閉關入深山

所以趁而家sem break，搞得幾多得幾多

日子就大概定左，遲D我會寫個擇日子post

希望將我籌備婚禮既一點一滴都寫低，將來睇返都係一個美好既回憶呀

講返對鞋先，為咩事乜都未搞就搞對鞋呢???

話說20 May Fri收到我哥電話，佢話 5-9 Jun同我一齊去意大利影pre-wedding

意大利pre-wedding我諗都無諗過喎

我同東諗住去城門水塘影咋

咩意大利呀??? 邊有咁多錢呀??? 仲要2個禮拜後出發???

平時去開意粉屋咋喎...意大利我未去過架...意大利我麻麻咋喎

了解過後，我最後都應承左去

雖然有意想不到既收獲，但對於咁陌生同埋完全不在自己計劃之內既旅程，我硬係有D不安

得返2個禮拜時間，脂肪又燒唔切，唯有搞D實在D既野啦

好彩而家係sem break，有時間周圍撲，又好彩禮拜5知，第日放假可以多D時間尋寶

我地計劃左今日去金都同百利睇鞋，但有人話金都勁鋸人，佢recommend我去百利

咁好啦.....我地就放棄金都....去百利target果幾間睇下啦

其實出發前都有做下功課，睇下百利邊幾間有人介紹

唔知呢D係咪又叫好彩，我地太早去，間target都未開舖，百利既人果然3點不露

我地唯有戇居居咁周圍行下啦，點知發現地下果層有間鞋舖開左



入到去見到個叔叔整緊鞋，相信佢就係老細

睇過D款同一般結婚鞋無分別，不過就無好浮誇果D所謂韓款

再睇真D，呢期好興既結婚厚底波鞋，男裝皮鞋，褂鞋都有齊

問埋價錢，4吋高既鞋都係$28x ..平過我心目中$3xx既budget

著落去仲要好舒服，老細話自己做既鞋一定舒服架

當然我無即刻confirm啦，始終都想睇下間target既款同價錢

原來叔叔叫Tony......難怪我一著對鞋就咁鍾意...情有獨鐘





終於等到2樓幾間鞋舖開喇，果然一開就好多人逼爆間舖

望過D款，同叔叔果間都係差唔多姐，由於太多人，價錢都無問就走

去另一間舖，款係多D既，但我都唔鍾意浮誇款，所以無乜吸引力

再著上腳...鞋底硬掘掘..完全同叔叔既鞋差好遠，唔洗諗...一定落去搵返叔叔

如果現成鞋既高度啱你要求，佢已經有現貨比你，因為佢都幾齊size，連size 32都有

但我有遠大既理想，要向高空發展，所以要造，仲貴少少添，大概$32x

本來造鞋要3個禮拜，但叔叔知我地勁急，佢幫我地打尖，1個禮拜造起比我地

著左真係勁舒服，自我感覺良好，覺得對鞋好靚






東試完對皮鞋都話好舒服，所以順便買埋

結果2對鞋佢只收我地$718