文盲語障楓賞之旅 - Day 4

9 Nov 2013 - Sat -

Day 4 - 太宗臺 → 海雲臺 → 廣安大橋 → 西面shopping → 南蒲洞食燒肉

終於去到尾聲, 呢2日可以瞓晏D喇, 前幾日都要0700, 仲早過返工

今日第一個景點係太宗臺

於南浦洞LOTTE對面既巴士站搭8,30,88,66號巴士到總站落車, 需時大概 20 min

我地買遊園列車代步, 1500won = HKD11 唔洗行到腳都跛

又是晴朗的一天..........暫時

遊園列車第1站 - 展望台 -

呢個母子塑像好有意思

當有人想由呢到跳落去自殺時望到呢個像尤如憶起母親對自己的眷顧

諗起媽媽咁辛苦帶你到呢個世上, 含辛茹苦養大你, 怎能如此輕易放棄自己呢?

由展望台望到既大海是無邊無際的

好可惜今日多雲天陰, 不過無落雨已是萬幸

展望台另一邊望落去係懸崖, 跌落去實粉身碎骨

諗起都驚驚

太宗臺裏的第二個景點 - 影島燈塔 -

下面係必到景點之一

好快我會成為下面既蟻民之一

因為落到去就睇到神仙岩同望夫石，楝喺到果舊咪就係望夫石囉

相信唔洗講都知咩係望夫石啦，都唔明點解以前D人咁易等兩等就變化石

~~我地要準備行落去喇~~

落去岩石既另一邊有好多一檔檔既海鮮食肆

坐喺懸崖邊不特止仲要食親都係生既海鮮

因為呢到D檔主係即釣上嚟就整比你食, 生吞喎,完全挑戰你膽量

團友們, 就係沿住呢條路行過去架啦

呢到D岩石層好靚架, 有D好似雲石

我地就係由上面行落嚟架，原來有咁高架喎

影相是指定動作吧

我地向下個地點進發

去神仙岩時我地行左一條用木板搭成既路，就好似昂平棧道咁易行

但上山為左快同路程短D, 我揀左條石級泥路, 咁當然係辛苦少少啦

睇下阿文行到咁慢就知

佢上到嚟直情扯晒蝦咁

仲話呢幾日食幾多野都無問題, 我地行左咁多路, 乜Q都消化晒

~~ 笑死人咩 ~~

跟住嚟到太宗臺最後一個景點 - 太宗寺 -

我見到佛陀時即刻忍唔住同阿文講：唔得喇! 我真係好想同佛陀頂禮三拜

講完即刻向佛陀行接足禮同祈願

呢個時候我好確實感受到佛陀在聆聽我既祈願

並感受到有道好溫暖既光慢慢照耀著我背部

真係感受到無比咁溫暖

連阿文都睇到我祈願時既奇景, 由本來既陰天, 突然有道陽光照住我

真架!!! 佛陀真的存在, 並一一聆聽眾生既訴求

之後我地搭返車去海雲臺

同埋先去呢間食人蔘雞先

文盲既我地當然唔會知佢寫乜啦, 惟有指住本書比佢睇

又一堆既Kimchi, 一向都唔食辣既我嚟到韓國已頂硬上食左好多

我受夠喇, 已經爆晒瘡啦

呢到既人蔘雞真係唔係幾啱我口味, 就算加左海鹽我都覺得好淡

淡既程度以為自己無左味覺

同埋我一向唔鍾意食爛飯, 韓國餐餐飯都已經夠爛架啦

人蔘雞仲要釀D飯入去再浸到淋晒, 我真係唔識欣賞

今日第2個景點 - 海雲臺 -

呢到係釡山7大海灘之一, 係著名既海水浴場, 一到夏天就超爆多人嚟游水

真係值得到訪既一個地方, 特別係情侶

海雲臺特色係有幾十隻海鷗同你近距離接觸

你可以買包卡樂B蝦條餵佢地

 

佢地個樣雖然得意, 但幾十隻向你飛埋嚟都幾驚

呢個情境好似動物大遷徙咁 

原來天氣凍海鷗先會飛嚟呢到, 所以我們見到佢地是幸運的

我地見仲有大把時間,就去埋迎月之路

迎月之丘既美人魚

沿著一直路行就可到展望台

呢到係著名睇日出既景點

遠望果條橋係廣安大橋, 我地陣間會去既地方

喺咁凍天氣下依然要食返支蜜瓜雪條

由於未完全黑晒, 我地中途去左西面shopping

西面呢個站完全唔洗出戶口, 係一條地下購物街

唔好睇個站名咁似粗口呀, 實則令你樂而忘返, 睇我完全唔記得影相就知

d衫又多款又平, 仲有好多accessories買

最好彩係原來我地shopping期間出面落大雨, 好彩避過一劫

 好喇~~係時候講返廣安大橋喇,地鐵去到廣安站3號出號大概行12mins就到

話咁快已較啱時間入黑, 可以欣賞到廣安大橋既夜景

真係超爆正

今日一整天既行程完全係拍拖勝地

釡山人好幸福, 香港去浪漫D既拍拖地方都山長水遠又偏僻

但呢到每個景點都有地鐵到, 落車行一陣就到

 

呢到真係好正, 我完全留戀到唔捨得離開

奇怪的是我開閃光燈對住個天的一道光影相時就出現呢個效果, 影到好似宇宙咁

到底一點點果d係咩嚟既呢??

今晚係最後一晚喺韓國食既晚餐,嚟到韓國無理由唔食韓燒架

上網search左附近有間, 但搵極都搵唔到

最後問人時佢地話已經執左, 韓燒生意真係咁難做咩?

最後我地見到呢間有英文menu就入去試下

好唔好食都唔知, 總之見到係韓燒就入去試啦

(張相係我第2朝補影架, 因為果晚落雨要擔遮, 唔鬼記得影相)

我們又是幸運的

可能個哥哥見我地完全唔知要做d乜, 佢索性嚟服侍我地

又或者呢到興幫你燒埋?? 唔理啦, 反正有靚仔服侍

佢先將2個薯仔連皮剪成一片片, 原來咁樣燒係好好食架

燒到脆卜卜, 好似食緊新鮮薯片咁

而蒜粒直接放落去燒

陣間係要連埋呢堆葱食架

今勻真係將咁來以嚟無食葱既份量一次過食晒

我地嗌左2個豬肩肉既set, 都係5900 won/set, 即hkd44

1set 1塊豬肩肉, 但唔知點解比多塊細細舊我地呢?? 賺左賺左

煎到咁上下後就幫我地剪埋一條一條

好貼心既服務呀!! 真係要大力推介

浮誇樣~~ 我鍾意

~~ 食得喇 ~~

將舊肉放於昆布上面, 再加少少用汁撈過既蔥一齊食, 超級美味

完全食唔停口

燒過既蒜就咁點呢個sauce食, 我唔鍾意就咁食蒜, 但即管試下

surprise係口感似燒白果, 無我地食開果d咁濃味, 食完亦無口臭

不過始終唔好呢味野,試過1-2粒就算

返酒店前去便利店又買蜜瓜雪條食

真係超好味, 食上癮

~~ 今日旅程完結 ~~

話咁快已去到尾聲, 玩埋聽日就無啦