23 Feb 2014 - Sun -
第1次跟美食之旅去玩簡直畢生難忘
諗住平平地報個2日1夜溫泉團relax下啦
點知中伏.......報著個坐車坐到pat扁團
不過都唔關美食之旅事既......係自己唔知頭唔知路報左個陽山第一峰團
原來係清遠果頭, 陽山係廣東最北既地方
淨坐車都坐左7個鐘, 來回加埋14個鐘
再加上我暈車浪, 唔嘔都算叻叻架喇
§
§
§
我地0800喺羅湖口岸茶餐廳集合
跟住就搭呢架旅遊巴出發
勝在架車夠寬敞，又乾淨，坐好耐都好舒服
經過2個鐘頭車程就去到呢間酒家食lunch
由於H7N9爆發，出發前已公佈左唔會有家禽供應
都好既，反正返上去我都唔敢食雞
所以由本來既片皮鴨餐改為農家菜，清清地都幾好呀
食飽飽，我地又搭多2個鐘頭車去到當地一間最大型既Supermarket
雖然唔知點解咁都當係景點，但一場嚟到就即管入去見識下咩係超級市場囉
真係超大既supermarket，但價錢同香港差唔多
人仔高企，即係仲貴過香港先啱
為左振興當地經濟，點都要消費消費既
購物完又要起程，搭多3個鐘頭車先到陽山
陽山出名多山，一個山峰接一個山峰
窗外風光雖然靚，但呢個時候我已暈車浪，無能力欣賞喇
幾經辛苦，我終於捱到嚟呢個溫泉渡假村
再坐落去，我實嘔硬
我地終於到房喇
原來係住別墅唔係酒店，間房超大超正，又乾淨
果然美食之旅重點真係在於住宿，望到間房都覺值回票價
一張單人床已有5呎，點反瞓都唔怕啦
仲有我期待已久既私人溫泉
原來係浴室入面，開個掣就有溫泉水
唔洗浸外面既溫泉，咁就唔怕污糟啦
欣賞完咁美好既房就落去食晚餐
呢到既環境都幾靚幾舒服
話明農家菜 D 菜式都唔荒好得去邊架喇
叉燒包一碟
同埋都係今朝 D 餸囉
咩清蒸鯇魚，五花腩，豆腐，青菜，腐竹炒腐竹之類
同枱團友話嚟到清遠怎能不叫雞，於是比RMB98叫左隻清遠雞食
我D車浪都未暈完，呢餐完全無胃口
夜晚仲包埋睇民族歌舞表演
悶到爆，不睇也罷
睇左10mins就離場返房浸溫泉
沖埋涼浸埋溫泉開始恢復精神啦
好彩我頭先振興超級市場既經濟咋
如果唔係今晚仲點會有宵夜
第2朝瞓到10點先出發，11點check out，真係爽爆
呢間就係我地住既別墅喇
門外小路
呢到就係戶外溫泉，有浸既團友們都話乾淨
環境清幽，吸多幾啖清新空氣先
呢到就係酒店
慶幸我地係住別墅姐，咁先有私家溫泉浸
跟住搭1個鐘車嚟到呢次旅程最後一個景點
北山古寺 - 建立於明朝
呢位導遊阿賓好搞笑
喺古寺門口教大家八鍛錦
我地當然爭取時間去參觀呢個古寺啦
呢間寺真係超大，大雄寶殿門前有西方三聖
一入寺門右邊有地藏王菩薩
行前少少有500羅漢像
西方三聖前留倩影
呢到真係睇到我O晒咀，超多西方三聖像同阿彌陀佛
完全大到離晒譜
連牆身都唔放過，都係鑲滿阿彌陀佛
金剛塔是也
由最高處望下就睇到呢個古寺有幾大
旅程結束
今次團費$498 + 導遊費 $120 = $618
抵唔抵就見人見智啦
食唔好，車程又耐，但勝在住宿一流，無掠水景點
本來我地係報賞花團架，點知唔成團就被逼喺已成團入面揀嚟參加
吸收過今次教訓
我絕對唔會再揀D咁偏遠既地方
報團前都係做下資料搜集先
偏遠地方才真正旅行
回覆刪除遠離都市，空氣都好D