望下山 望下海 MACAU旅行

31 Aug 2014 - Sun -

媽咪早幾日突然興致勃勃話要去馬交走一轉

趁8月份仲係爸爸既生日，可以享受埋金光飛航既生日優惠

凡於當月生日既朋友，每人每日可以$208購買來回船飛1套，最多可買2套

但我地有4個人，另外果2位團友可用中銀卡85折購買來回船飛

本住有著數咪走雞既精神，我地一於今日過大海

§
§
§

唔知咩事明明超好天超熱，但一上到船就落大雨 

1個鐘頭既船程話咁快瞓醒覺就到

咦!!! 睇嚟又幾好天咁喎

第1站去左新葡京後面間瑪嘉烈嘆返個葡撻先

  

怕熱既朋友千祈唔好嚟，因為只能夠坐室外

熱死辣辣下食個熱死辣辣既葡撻，幾好食都無用

但因為我食過番尋味，就算滴晒汗都唔理，身水身汗就只為呢件撻

我真係覺得好好食架

跟住沿路行出去大街就到達議事亭

天氣好!! 張相都靚D

因為就嚟中秋，成條街都掛上綵燈，好有氣氛

雖然唔會每次行上去，但都係每次必影既大三巴

胡椒餅亦係媽咪每次由大三巴落嚟後必買既小吃

跟住去左好出名既榮記食荳花同湯麵

  

 左邊係豆腐布丁，一d都唔平，要成$16/個，不過食落真係好香濃豆腐味，同埋好滑

右邊碗豆花加左花奶，滑係幾滑，但就唔係必食推介囉

反而呢碗鯪魚球麵我極為欣賞

粗麵夠彈牙爽口，無我最怕既鹼水味 

湯底夠濃，唔需要加任何醬料都已經perfect，值得推介

店內環境較為狹窄及古舊，好多時呢類舊舖先食到好野

但放心......冷氣絕對足夠

下一站就係呢間搵路搵左成個幾鐘既廟宇

內裡有供奉和合二仙

我完全唔明媽咪點解係都要去呢到

不過既然一場嚟到，即管同你一齊拜拜和合二仙啦

  

跟住搭返巴士去澳門大街，滿足爸爸食翅既願望

永世都要排隊既添發碗仔翅

睇下家父個樣幾開心 

食碗翅姐.....洗唔洗呀!! 好似做代言人咁

我地揀左3款試下

上面既係海蔘煲仔翅 $60

左邊係竹笙雞絲碗仔翅$30，右邊係豪華碗仔翅 $40

家父翅後非常滿足，講左好多句好好食，總之佢開心就好

呢間最香係位於食翅條街既後面，去之前請google下，如果唔係都幾難搵

雖然較為舊同位置徧僻，但佢既杏仁餅真係好食

蛋黃肉心杏仁餅，真係從未食過呢款，好香蛋黃味

可能我好鍾意食蛋黃，所以我堅覺得好好味

之後嚟到氹仔既菩提禪院

真係一個好值得推介既地方

 

環境清幽，加埋門外既羅漢松禪味極濃

令人舒適自在

一入大門的四面佛

之後再搭返車出黑沙環既新益美食

又係好難搵既一間食店

沿路都keep住問人先搵到

新益美食除左出名好食夾抵食之外，連菜名都好搞笑

呢樣係 "煲蓋一開 健康常在"

即白菜+黃芽白煲豬骨湯，有菜食亦有湯飲，都唔錯

"新益與你齋撈起"

即係大量蔥 ,蒜 , 芫茜撈鯇魚皮

個人嚟講覺得葵芳金潮整得好味D

"椒鹽年藕餅"

非常之好食，表面香脆，唔會太多粉漿一齊炸

"啫啫雞煲"

永無失手之作，雞香味濃.....好食

4個餸， 4碗飯，1支啤酒埋單都係$3xx

搭車回程去氹仔上船

想影下醉人夜景都唔得添

去到威尼斯人，見到吳彥祖 

唯一一個係唔會被吳彥祖比下去既合照方法