西貢寫真日

14 Sep 2014 - Sun -

今朝有人零晨已經出發去西貢做計時工作

我呢個咁體貼既女朋友當然會陪伴左右啦 (真係覺得自己好好呀)

咁當然我唔係零晨入去啦，雖然戀愛大過天，但都唔係盲目既

大概4點幾入到去，接埋佢收工後就去海傍浪漫下

記得有段時間我每個禮拜日都入西貢，當時我仲未有人要

果陣時諗，將來一定要同男朋友仔去呢到拖手仔散步，睇下狗仔咁

但之後當然唔記得左自己曾經有呢個夢想啦

今日同你一齊行呢到時又令我諗返起當時既夢想

我發覺自己好多時有一刻既念頭都慢慢地實現

好似以前我行經金鐘，見到好多人著SUIT返工，當時會諗 "如果第時喺金鐘返工就好喇"

結果我真係喺統一返工，之後仲搬左去朗豪坊添

近呢幾年又諗 "如果喺HARBOUR CITY附近返工就好喇"

結果..........我好快會實現呢個念頭

仲有其他既念頭我都有一一實現

有好多夢想唔係無可能實現，只係時間性問題，只要堅持，我好相信你會得到想要既野

§

§

§

入到西貢，當然要為我個新髮型影返輯寫真喇

由我讀完書後一直都係長頭髮

就算短極都會長過膊頭

今次都可以話係灑脫的一次

唔止我，連佢都要影寫真

真係以為自己係男模咩

好多人問我點解咁捨得剪到咁短

我第一時間都係答 "失戀丫嘛"

咁通常電視劇失戀都係剪短晒再加幾滴眼淚架嘛，我都係跟返劇情所需姐

今晚我地揀左食泰國野

唔好睇少橫街窄巷既舖頭仔，一樣煮出好味既泰國菜

泰菜必嗌之一 -冬蔭公 -

好味~~~ 可以叫小辣，慢慢訓練下自己食辣野

我地每次食泰菜必嗌之二 - 肉碎生菜包 -

唔太欣賞呢個食法，佢將D菜墊晒底，感覺濕淋淋，應該要將2者分開架嘛

雖然肉碎夠味亦唔乾身，但生菜唔夠脆

- 芒果海鮮炒飯 -

本來仲以為得表面幾粒芒果，原來內裏都好多鮮芒果肉

又甜又多汁，好好味呀

- 馬拉盞炒通菜 -

繼蝦醬炒通菜後，我非常鍾意食通菜既其中一個味道

不過就一定唔會食腐乳通菜，因為腐乳好難食

痴左線，食完飯差唔多7點，個天都仲咁光

我地食飽飽又行多轉消化下

仲可以影到咁靚既景色

呢3隻牛無啦啦唔知由邊到走出嚟

好專注咁食草我先敢埋去影相

佢地好乾淨，一D味都無，相信有人細心飼養

我既慣性動作 - 拓下巴 -

其實佢唔講，我都無為意自己成日拓下巴，今次真係有圖有真相

日落後既西貢擁有非常醉人既景色

連廁所景都靚過人

咁就過左一個悠閒的半日遊

今個月既14號過得好開心，亦好滿足

希望我地可以一起過更多個14號