14 Feb 2015 - Sat -
原本已一早plan左今個情人節留在迪士尼 2人世界尋找真愛
但前幾日同事話佢個女有張飛需要我地幫忙用左佢
咁我無理由好樣衰咁喺Disney門口叫人要架，陣間以為我賣黃牛拉鬼左我咪死
我唔想情人節喺警署渡過
咁我就即時諗到，不如帶紫昕去啦
紫昕一知道可以同我去Disney開心到顛左
仲可以藉著今個情人節，比隻笨仔一嘗家庭樂
扮一家三口既滋味嚟圓滿佢曾經想有小朋友既心願
反正在現實生活中佢係無辦法達成
§
§
§
湊住個小朋友真係好多制肘，要就紫昕既畫班，搞到成2點幾先入
入到去肯定排長龍玩唔到幾多野啦
呢粒妹丁完全係興奮mode，只係搭車都開心成咁
呢D先係最正中既 "笑到見牙唔見眼"
唔知呢對Mickey & Minnie係咪情人節period先有既呢?
我地第一個玩既遊戲係Toy Story既降傘兵隊
我無諗過紫昕驚唔驚，我只知我好想玩，亦好想帶佢玩D佢未玩過既野
所以一直遊說佢唔洗驚，同埋用激將法令佢想玩
所以我叫呢位小公主不停望下人地點玩，以減低佢驚既程度
當然排隊時亦不忘訓練點樣極速降落啦
會唔會因為咁樣愛上我個東哥哥架
第1張的一家三口合照
小公主似唔似我呀?? 似唔似姐??
果然似姑姐，夠大膽！玩完都仲笑得出！
同姑姐去有樣好處，就係姑姐會做D平時媽咪唔肯比仔女做既野
跟住我地就放棄Toy Story其他game
拿拿臨去睇米奇幻想曲啦，我已講過，每次去Disney我一定要睇
唔去我會唔開心架
然後拿拿臨去玩佢由未入園講到而家既咖啡杯
轉到暈陀陀~~ 小公主仲笑到卡卡聲
爭D連啖阿華田餅都嘔埋出嚟
巴斯光年又係佢requested之一
你話丫~你話丫~帶住個豆丁我玩得幾少野丫
玩完巴斯已7點，2哥吩咐落7點要比粒公主食飯
本來我諗住連飯都唔食繼續去玩架喇，小公主都同意唔食野架
不過東哥哥制止住我既決定
咁唯有死死氣去食蕃茄豬扒飯啦
食埋飯睇埋花車巡遊就要送公主返城堡喇
影呢張相時，Disney姐姐話 "媽媽，企埋少少丫"
佢唔知呢個女其實係偷返嚟
返到現代化既城市，可以變返做紫昕啦
相信紫昕今日爆開心，因為我沿途不停幫佢問人攞左好多Disney Sticker
佢已不停話好想要美人魚貼紙，好彩臨走時在美國小鎮大街攞到比佢咋
佢當時開心到顛左，不停講終於有美人魚
其實姑姐今日都好開心架
可以同紫昕一齊去Disney之餘仲可以令到妳咁開心
姑姐做到既都會儘量滿足妳既要求
姑姐要妳開心、幸福、快樂地成長
送左紫昕返屋企後，我地就喺附近搵間餐廳撐下枱腳喇
呢間Amazing Place真係amazing，我係絕對絕對唔會再幫襯
等左好耐好耐好耐，先食到頭盤
其實呢個時候已成9點幾，間野淨返幾圍客人，但出菜效率極慢
跟餐附送既瑞士雞翼，味道都幾好
又係等左好耐先上枱既羅宋湯，仲要係凍既
我地當然叫人換啦，聽到個疑似老細同個女人講，D湯未滾唔好上枱
頂丫~~~ 未滾起都比人飲?? 個女人仲要不停笑笑口咁話 "係呀? haha"
等到就嚟瞓著先上到主菜既黑豚肉
簡直韌到無朋友，咬到牙骹到攰埋
相信薯條好難整得難食，這是唯一一樣清晒既食物
飯後甜品當然係過隔離既發記啦
情人節怎能沒有心太軟甜蜜下呢?
話說有日煮完飯入房，就見到有份禮物喺枱面
心諗：你隻死笨野丫！又浪費錢下嘛！
個衰仔又買頸鍊比我，我頸就得一條，要咁多鍊把托咩
再加上我已有好多頸鍊喇，邊帶到咁多呀
不過又真係好靚既
鬧完一輪之後，佢話：um....咁以後就帶我送比你果d啦，咩ex果d唔好帶喇！
哦........
雖然餐飯難食
但能夠同你一齊食，鹹魚白菜也好好味
話咁快又一年了，但感覺好似啱啱才開始咁
多謝你一路既包容和體諒
可能我地年紀唔細，所以我地無年輕人既脾氣
我地未發過脾氣，又未鬧過交，唔知幾時我地先會轟轟烈烈咁鬧一場交呢?
但睇怕都幾難，因為我絕少絕少發脾氣之餘，你又極度極度就我
好希望我地能夠一直相愛下去，縱使將來遇到任何問題我地都一齊面對，一齊承擔
你要令我每日都活在幸福當中，可以嗎？
留言
張貼留言