14 Jan 2015 - Wed -
又到1個月1次既14號喇，今次又翻炒去小妹生日飯間餐廳sweet sweet
我問佢：點解又去呢間既?
佢：因為知你鍾意食囉！
佢咁答表面看似好sweet，但實則......
我心諗：妖~~知咩鍾咩意丫！3個字，無新意！
雖然好無新意咁又係食呢間，但其實我都真係鍾意食架
只係又要嫌下佢無諗頭咁解姐
而家我公司好方便，過海可以搭船船架
我地懶浪漫咁望下海，自下拍咁囉
呢個笨仔貪新鮮咁買左個電話鏡頭
實驗證明，套個鏡頭落電話到自拍可以影晒成幢IFC，如果無用鏡頭係唔得架
好啦~~原諒你雖嘥錢但無買無謂野啦
我地準備開餐喇
開餐前循例都要cheers，同埋講聲14號快樂
encore呢間既重點都係為左呢個黑松露醬薯條架咋
個醬真係好好味
再度encore caesar salad配軟殼蟹
真係食過番尋味
今次我地試下呢個all day breakfast
奉勸大家唔好嗌，真係非常之咁唔好食
鏡頭一轉我地已經返左青衣食甜品喇
話說之前行過青衣碼頭，發現商場內有間甜品舖好吸引
仲要標榜個廚師係5星級酒店既甜品主廚
所以今日特登嚟會一會你
我地嗌左呢個芒果牛乳布丁
賣相都幾吸引
原來食落係好好好好味架
牛奶一D都唔騷，夠滑夠香濃，再配埋鮮芒果簡直一流
但略嫌個布丁甜左少少
而呢個係法式焗梨配vanilla ice cream
見到中間一大片燶野就知食落好大陣燶味啦
食頭幾啖都OK，可能因為熱辣辣
但食多幾啖就唔多識欣賞喇，可能法式既野好難取悅到我地
呢餐甜品為我地既14號劃上未完美句號
但都好感恩你為我安排既一切
食飽飽，我地由海傍散步返屋企
呢個時候，我鼓起勇氣..........
好害羞(篤住手指)地對他說：我每次都好期待14號既來臨架，你係咪架？
佢：我唔係架喎......
我：......
留言
張貼留言