正宗平靚正的泰菜 - 金柚泰國餐廳

12 Mar 2015 - Thu -

大忙人Ella人緣好，生日飯局多到要派籌

好彩我早在半個月前已預約，咁先可以派到12號呢日籌咋

我希望佢出年可以接受提前1個月申請

§

§

§

每次食生日飯我都鍾意嘗試唔同既餐廳

知道Ella鍾意食泰菜，而我印象中記得大角咀有好多筍野

果然比我search到呢間位於樂群街平靚正既泰菜 - 金柚泰國餐廳

位置較為偏僻，但又唔係真係咁難搵，尖沙咀搭21號綠van到總站落車對面街就係

睇到開飯網既食評都係好評如潮，詳情click → Open Rice

一於決定食呢間，為左可以食多D款式，誠意邀請埋阿文加入一齊試菜

等我地3個會一會佢係咪真係傳說中講到咁好食

搶先第一道出場既係生蝦刺身

以前我都唔係好敢食生蝦，始終心理上覺得有D恐怖

但有次在Combo食完之後就改觀左，雖然未去到愛上，但變成食泰國菜必嗌之一

呢到既廚師好有心思，砌左個雪人冰鎮住D生蝦，創意度十足

蝦身鋪上熟蟹子，有別於外面食法，但蟹子可能煮過龍，失去了脆卜卜既感覺

蝦刺身口感彈牙，配上蒜片同埋醬料，簡直係美味 

個sauce看似好辣，但我唔太食得辣都食到，證明食開辣既人會覺得無乜料到

 泰國菜不能不點的冬蔭公

由於我每樣order都話要少少辣，所以呢個湯好啱我飲

真正色香味俱全，唔會因為唔辣而覺得唔好味

份量方面大概有6碗，3-4個人嗌一碗就夠喇 

接住出場既係青木瓜沙律同泰式咸魚炒芥蘭

後者唔洗講都知一定好食，但前者我麻麻地，唔係唔好食，只係我對佢無乜感覺

可能第一次在青衣城I- Thai食時比佢既勁辣嚇親，所以有陰影

但佢係Ella最愛，當然佢讚不絕口啦

咖喱乾炒軟殼蟹

又係好食推介之一，呢味直情完全唔辣，咖喱汁甜甜地，撈白飯一流

每隻蟹下面都有蒜蓉包同矮瓜墊底，所以真係食得晒先好叫白飯

由於蒜蓉包墊底關係，成個包都浸稔晒，我建議分開上會好D

蝦醬炒飯

呢個又係不得不嗌既炒飯，真係香濃惹味，蝦醬恰到好處，完全唔會覺得好咸

除非你唔鍾意蝦醬，否則一定要嗌

我地果然大食，3個人嗌5餸1湯

但重點係每人都只係$140，可能鋪頭位置偏僻關係，所以唔會set到高價

咁我地呢D小市民先可以用合理價錢食到此等美食

由於我地話題未完

所以用埋第2個胃食完甜品先肯離開呢個大角咀

鮮果珍珠 - $25

好多生果，珍珠亦夠煙韌，但略嫌甜左D，落少D糖水會較好

朱古力綿綿冰 - $38

第一次見阿文食綿綿冰，仲要不是在夏天進食，簡直奇觀

呢舊唔記得抹茶乜東東都好正

非常欣賞抹茶雪糕底下既牛奶布丁，再配上起沙既紅豆，真係好好味

多謝阿文請我地食糖水，無啦啦屈左妳一餐添

食飽飽我地就漫步出奧海城shopping

當然係去我買野有折果間shopping啦， 大家都滿載而歸