難得的假期入廚樂

11 Apr 2015 - Sat -

今日難得星期六唔洗做義工，終於可以放下假，一於又玩煮飯仔，練習下D廚藝先~~

一煲湯係住家飯既重點，可以少一款餸，但絕對唔可以少一煲湯

今朝9點幾就起身摷下屋企有咩剩餘物資，咁都比我發現媽咪收埋D好野喺櫃頂！好....一於就煲呢個五指雲芝湯~~

呢D湯包好方便，所有材料齊晒，隨自己喜好，加舊豬骨/瘦肉/雞/螺頭煲就得

1. 先將所有湯包內既材料洗淨，然後浸半個鐘

2. 預4人份量，我買左$20瘦肉。將瘦肉切成細舊。

3. 出水

4. 見雪櫃仲有剩餘紅蘿蔔就加埋落去煲

5. 這裏大約15碗水。水滾後將所有材料放入煲內，以大火煲滾後轉細火煲3小時就可。

6. 隨口味落鹽。完成。

下晝我地去左旺角買野，反正出開去，就一於喺旺角街市買埋扇貝同鎗魚。

旺角街市買海鮮平好多....我地唔殺生.....所以只買死左果D!!! 扇貝$50/6隻~~ 鎗魚 $30/1條

蒜蓉蒸扇貝做法：

1. 先洗淨扇貝，黑色果D內臟全部唔要。

2. 將預先浸軟既粉絲用少少豉油撈勻。

3. 粉絲平均咁鋪上扇貝面，再加上蒜蓉及蔥花。若將粉絲鋪底亦可。

4. 大火蒸約6-8mins就可。

蕃茄炒蛋做法：

1. 先將2個蕃茄切丁，2隻蛋打勻後加一茶匙豉油。

2. 油燒熱後加入蛋不停炒勻就即時上碟備用。

3. 先將蕃茄落鑊炒一陣。  

 4. 加入1碗水，大概1湯匙茄汁及半湯匙豉油與蕃茄一起煮。蓋上鑊蓋煮大概1-2mins。最後加入蛋炒一陣就可。

豉汁蒸鎗魚做法：                         1.先將豆豉壓爛，與蒜蓉拌勻。  2. 待燒熱D油後略為爆香D蒜蓉豆豉。                                                  3. 蒜蓉豆豉及蔥花鋪上魚面，水滾後蒸大概8mins。                       4. 最後，淋上豉油熟油就完成。

                   

連埋炒菜芯及台灣買回來的鴨舌，2個人食5餸1湯。

超浮誇，完全唔合乎慳家之道。