沒有最抵，只有更抵的台北hea足7日遊 2015 - Day 6 & 7 End trip

3 - 4 Apr 2015 - Fri & Sat -

Day 6 - 台北道場 → 五分埔 → 饒河街夜市

今日有D私事要辦，晨早9點幾就出發，直到5點先返酒店

所以Day 6只能夠同大家分享夜晚果part

不過其實都無乜野sharing喇.....因為我地又翻兜饒河街夜市之嘛

我倆實在太愛呢個夜市喇~~ 唔掃2次都覺得無嚟過台北

做完私事....先返酒店洗個面....換套街坊LOOK就出去放飯喇


見時間尚早，上去台北道場禮佛先

每次到台北道場既如來殿都比人有種好舒服...可以放鬆既感覺

剛巧有清明水懺法會，可以見識到莊嚴的壇場

我地禮佛三拜後就離開喇

之後過去對面五分埔見識下，睇下係咪真係好似傳說中咁瘋狂掃貨

但結果空手而回，衫的確係平，但D款好普通，唔太吸引我去買

都係食野吸引D，最後一晚既掃街，食盡D

檸檬椒鹽魷魚是不可少的

另外再翻炒陳董十全排骨，再整多個肉燥飯添

不過麻麻地....始終都係謝謝魷魚焿既肉燥飯好食D 

今日再試埋手卷

前日見到都已經心思思想試架喇，但想留位食其他所以無食

今日last day喎，梗係要同佢farewell下啦

揀左美乃滋蟹足肉口味

確係幾好食喎.....紫菜夠脆....仲要手卷唔係飯底....係菜底.....食多幾卷都唔怕撐飽

再度encore同一檔海鮮

本來想試其他檔，但睇落都係呢檔正D

今次無嗌蛤蜊，試海鹽扇貝.....但個人認為都係蛤蜊好味好多

  行行下比我見到檔野直情興奮到尖叫咁滯

<< 比我重見返呢檔黑糖喇 >>

前日嚟時無開，仲以為執左，搞到我down左好耐

話晒我去饒河街夜市其中一個目標係狂掃黑糖架嘛

好彩再翻炒姐，如果唔係呢個trip我會好遺憾

  

呢檔黑糖有好多種口味揀，唔同口味有唔同function，尤其對女性好有益架

慢慢揀下揀下都買成四十幾粒

仲可以試左味先買

臨走前我地仲去隔離檔買左呢碗手撕雞返酒店宵夜

超特別既口味，可以揀3款配菜，配上佢秘製醬汁

好味都唔識形容...只可以話我必定encore.....如果唔知幾年後再嚟而又未執的話

但堅強烈推介.....不可不食

返酒店點算黑糖時越數越興奮....比人偷拍都唔知

我honey仲話我唔洗開心成咁下嘛

 

Day 7 - 西門町買手信 → 金光明寺 → 西門町 → 香港

唉~~~到最後1日喇

先去西門町幫人買牛爾Mask，跟住就去上海老天祿買鴨舌孝敬我倆既雙親

反正一向食開謝記老天祿

今次咪試下呢間囉......無乜分別.....一樣咁正

  

午餐於謝謝魷魚焿用膳...肉燥飯...肉燥米粉.....魷魚焿....全部都好味到暈

今日唯一既景點就係去金光明寺

於捷運新店站外搭779公車到辭修高中落車，一落車就見到

金光明寺係佛光山位於台灣北部既總本山

好期待見識下

咁啱又有法會....誦地藏經

我地見有時間都誦左一陣

大雄寶殿門外草地上有好多小沙彌擺設...好可愛呀~~

大概5點幾就死返去西門町食埋晚餐就要去機場喇

由於盤川用盡.....所以揀左呢間平平地食Pasta 

需要在門外落左order先可以入座

呢個安排都幾好喎....確保你唔會hea住等人唔叫野食但又hold住d位

等食自娛 

意粉味道還好....但湯就好難飲....只可以形容為一碗有味既水

等候9點幾機...要走喇

但今次心情無咁低落.....因為返到香港唔洗第日就返工，仲可以放多3日假






一上到機就望下D洪瑞珍....呢間三明治出名之處係包質夠鬆軟

建議如果要排隊買就不必喇，但可以好似我地咁，早1-2日預訂

臨走果日先攞會好D.....因為就算你即日排隊都未必買得到

  

是日飛機餐.....肉燥飯

又食~~~真係食到最尾一刻

要食既食晒..要買既買晒..景點又去齊..呢盒肉燥飯為這個旅程劃上...句號。 

 - The End -