22 Oct 2015 - Thu -
難以想像我竟然可以幾廿年後參與母校既旅行
仁立呀~~仁立呀~~我真係返左仁立呀
唔係多得我2哥2嫂無得請假陪紫昕親子旅行....我根本零可能返到嚟
舊屎既回憶湧返晒嚟!!同學...老師...小息時玩既情景等等
我相信小學既日子係大部份人最無壓力....最開心既時間
雖然仁立出名功課多....以前同而家一樣....閒閒地10樣功課
但都係最開心....最多回憶既地方
8點鐘就要返到禮堂集合.....咁鬼早...好彩住得近
以前一返學就係呢個位置跟班別坐地下...誦完主禱文就等上課室
昔日的我：「我們在天上的父....願祢的...我們日用的飲食....阿們！」
今日的我：觀自在菩薩，行深般若波羅蜜多時，照見五蘊皆空，度一切苦厄
以前禮堂無摺門架.....因為以前都無冷氣既....只有好大把不銹鋼風扇吹到個頭亂晒
等候期間見到以前既老師....我真係好想同佢地講以前佢地教過我呢
禮堂既左邊係藍球場.....右邊係北操場....小息時就係喺到流連架喇
坐地下傾計啦...玩猜皇帝啦
小息鐘一响....我地就要即刻企起身唔準郁....一郁就比同學報串
難得老師話可以上樓去洗手間....我梗係衝上去回憶下啦
我超想去班房參觀添呀....但又驚比老師以為呢位家長唔知咩事
我唔可以影衰紫昕架嘛
認領返自己D仔女之後就可以出發喇
我第一次見紫昕著學校運動衫....突然醒覺佢已經大個女喇...唔再係以前粒豆丁
唔好話紫昕....連姑姐都好興奮
扮下媽媽帶個女去旅行
去到目的地指定動作
無論事隔幾多年都好.....旅行目的地始終如一.....又係元朗大棠渡假營
今日D小一生們可以盡情地跑....咁樣都幾開心丫
好多媽媽不停叫D仔女唔好跑
唔好跑?? 出嚟旅行咁大個空地都唔跑得...咁邊到先跑得
不過可能我唔係人阿媽....始終唔明佢地諗法啦
我同紫昕講....姑姐比你跑....但當我嗌你時就一定要返嚟姑姐到
結果佢都好聽話......我一嗌佢就返嚟....佢仲去親邊到玩都問左我先
見到有得扮美人魚....即刻叫紫昕塞個頭落去影
淨係得返個樣又覺得佢仲好BB樣呢
佢竟然第一個目的地係揀去踢波
又唔識學乜鬼人踢....最慘又曬....我喺側邊乾煎等佢
又驚佢中暑喎....久唔久就要叫佢飲水
去室內玩咪幾好囉.....唔曬又有冷氣
我好鼓勵昕玩跳彈床....因為以前姑姐嚟呢到都好喜歡玩
跟住去做D靜態D既活動....玩彩砂
仲以為可以坐定定睇佢玩啦
但原來對我嚟講一D都唔靜態.....不停行嚟行去攞彩砂比佢
搞到自己好忙咁
入完彩砂樽又要玩彩砂畫
返學咁辛苦.....總之今日你開心就得啦
回程返到學校時我好唔知醜咁問呢位老師認唔認得我，因為當年佢做過我班主任架
點知佢真係記得我呀....佢仲記得我地以前5個女仔一齊玩
估唔到事隔廿年後仲記得喎....真係好開心
今日任務完成....返到屋企Kobe好興奮咁貼到成臉貼紙
晨咁早起身....又曬左成日...已經好攰好眼瞓架啦
仲要陪Kobe踢波
叫佢守龍門仲要擺個咁嬌俏既pose比我
你話係咪傻仔....你話係咪傻仔
趁佢趴地執野時乘機踩住佢個PAT
佢仲一路執一路話: 邊個踩我...姑姐踩我
細路真係好打耳既姐
2哥仲特登整左3層海鮮塔比我地食添
~~ We're happy family ~~
題外話
而家小學生們辛苦過我地以前好多
我地以前返半日....我返上晝班....放學返屋企仲好多時間做功課
但而家要返全日...放得晏....功課又多又深....要應付測驗考試
仲要應付埋D無謂 TSA....點解要小朋友幫你學校爭取名次??
真係痴線.....小學既童年時光乜唔係應該輕鬆愉快咁學習咩??
幾歲人仔就要面對咁多壓力.....難怪紫昕極唔想返學
就連父母們都好大壓力好辛苦.....放工返嚟已經好攰
但都仲要同小朋友作戰到11點幾
唉~~~面對香港既教育制度....我地只能無奈地面對
留言
張貼留言