24 Jul 2016 - Sun -
自從爆肺出院後，我倆都無出下街拍拖
我想追返失去左既時間，所以禮拜六日都返Poly做final paper
但東又想去書展.....咁我都唔可以冷落佢既...特登抽一日時間同佢行下啦
其實我都幾怕行書展....自己無乜書卷味....對書真係零興趣 (馬仔一整套低能書除外)
仲要我逼餐慒之後漫無目的咁周圍行.......我覺得仲辛苦過擔泥
不過為左就我個honey, 唔好掃佢興, 我就陪下佢啦
一早佢已講定今晚想食拉麵...想乜鬼丫.....你一向都麻麻地拉麵
覺得一碗麵成舊水唔值丫嘛
你只係就我鍾意食拉麵，所以先話去食姐
我地揀左銅鑼灣登龍街間豚王
豚王個大名聽得多，成日都無的起心肝去食，今日終於可以一嚐你既拉麵
果然零失望....超爆好食
在門外等候時已揀好麵款
無論麵既軟硬度，湯既濃度，甚至配菜等等都可自由選擇
我就鍾意原始野....唔花巧....揀左招牌豚王 $85
果然係零失望，豬骨湯底極度濃郁，叉燒入口溶化
我食每啖麵都要連埋湯飲，成碗湯比我飲晒
東就試本月限定 - 德島王 - $95
醬油湯底夠香夠濃，但略嫌連埋生蛋食就太漿口，亦比蛋味蓋過醬油
雖然都好食，但相比起豚王確實失色不少
仲要價錢比豚王貴
食到身水身汗
食拉麵都係冬天食先完美
雖然店內多部冷氣，但食住熱辣辣既拉麵都不停出汗
留言
張貼留言