婚姻大事豈能兒戲。1 take KO 媽媽衫篇

16 Dec 2016 - Fri -

自己諗都無諗過可以1 take KO 媽媽衫呢個咁艱巨既項目

又要啱budget，又要合乎2位母親大人既要求，又要喺同一間2個都揀到啱心水既裙

諗到呢到都覺得頭痛

但好好彩...真係比我搵到呢間租衫舖達成呢3個願望

雖然有人講過2位媽媽最好唔好安排一齊試衫

因為2個有返咁上下經歷既人一定會互相比較

輕則口角，繼而動武 (誇張下姐)

但我重邊有可能唧到時間出嚟同佢地分2日去試丫

所以為左節省時間我必需冒呢個險

不過慶幸2位至高無尚既母親大人完全唔同style

我媽愛傳統旗袍，東媽愛晚裝，2位零衝突，亦零可能撞款

當然我都會打定底，先同我媽閒談間表示唔好比較，亦唔好直接或間接咁批評對方

我媽喺呢方面亦好識做，佢話男家係主佢係客，佢一定唔會揀D裙蓋過主家風頭

呢間In Wedding我之前已試過衫架喇，價錢合乎budget，大路既款式都好多

一開始未來奶奶好禮讓咁比我媽試先

我媽睇 Ipad 揀左1款，但始終佢鍾意睇實物揀衫多D

店員了解完2位媽媽既口味再揀幾款出嚟比佢地試

話就話只可試2件，當然最後可每人試3件啦

呢件係店員重點介紹

蟹爪菊花紋配紫色絲絨，望落連個肚腩都無埋，我媽著左都好鍾意






另一件都係紫色絲絨，但就配多D花花珠片，好搶眼，不過望落無上面果件咁靚咁slim






呢件都係店員推介，我地都覺得試左2件絲絨，可以試下另一款淺色系列

但媽媽唔鍾意，淺色系列望落好肥

到未來99出場喇

佢鍾意搶眼D浮誇D閃D既晚裝款

呢件佢都好滿意，影相時好chok，佢擺pose時連店員都忍唔住嘩左出嚟

咁啱呢件亦有同款披肩，可以襯到一set

呢件銀河系簡直閃爆，成件都係珠片

我諗當晚一定閃過我






呢件佢就非常唔鍾意，暴露晒缺點之餘隻色都唔好睇

試完衫我同店員講完價後就叫佢比時間我諗，通常都係講咩即時confirm先做到呢個價

但我地都需要商量下，我要了解清楚佢2個係咪真係滿意先仆鎚

Serve我呢位店員都好好人，比1個禮拜時間我考慮，如果OK就keep返傾好個價

最後傾到個Package租7件衫都係$5380，平均每件都係$768

之後每人只有1次機會1個鐘任試，當日揀款後無得再轉款

合乎budget而佢2個又啱心水我已經鬆一口氣

又KO左一個item，原來逐樣慢慢搞下都差唔多搞掂

雖然聽落結婚擺酒好似好多野搞好煩咁，但中間搞既過程係好開心，亦都豐富左我倆既經驗

希望2017我地繼續順順利利啦