有血有淚的大學生涯。終於畢業了

12 Oct 2017 - Thu -

2017可以話係我最辛苦, 承受著前所未有既壓力, 但又係最開心, 收獲最豐富既一年

2年前既一個決定, 預左過程唔容易, 但我依然咬緊牙關捱過了

我今日終於畢業了, 百感交集

可能對其他人嚟講可以好輕鬆, 但呢個學位對我嚟講真係有血有淚

今朝凌晨落機, 瞓一陣就要趕嚟行畢業禮

畢業禮撞左我地去東京個期, 原本真係有諗過唔參加架, 但好彩有位同事一言驚醒左我

慶幸自己有出席, 因為能夠上到呢個台真係唔容易

2年時間快唔快過其實係睇你心情

呢段時間每個星期5放工都係返Poly做功課, 個個都happy friday約朋友食飯

我都期待每個禮拜5既, 因為可以禮拜六日全日在Poly中渡過我個weekend, 只想儘快KO份功課

加上強迫症既我永遠要求自己在deadline前1-2星期完成, 咁我可以有時間重新review份功課

再用剩餘時間去安排結婚既野, 所以可以話無停過 

今日終於到拋帽呢刻喇, 希望我能夠將心裏所有壓力煩惱一一拋走

迎接人生新既一頁

首先我要多謝自己2年前作出呢個決定

細個唔識諗, 無好好為自己前途作打算

雖然呢個學位遲左幾廿年, 但總算還了自己讀大學的心願

仲要多謝2位並肩作戰既同學, 當中有人離隊, 有人消失, 剩返我地3個繼續作戰

比起其他組別, 我地真係比別人做多一倍功課, 但我地份功課依然有質素

我身邊既男人最功不可沒

多謝你一直默默支持我, 比我冷落都無怨言

為左爭取時間見面, 特登到Poly門口接我去食飯, 就算只有一個短聚都心滿意足

雖然我爸媽唔會明白讀書果種辛苦, 更加唔會明白讀書+結婚+裝飾果種壓力有幾大

但佢地今日係最開心既一日, 終於見到個女畢業了

去完旅行都未抖夠就要嚟畢業禮, 幾攰佢地都照嚟支持我, 仲唔怕熱陪我周圍影相

讀書前係人地女朋友, 今日畢業已係人妻

真係好特別既一年

當然唔少得我呢一生人既好姐妹Ella啦

正如我喺婚禮上面講..我好感恩亦好幸福有妳呢位好朋友

成個讀書/搞結婚/裝修過程有幾辛苦妳係最清楚, 多謝妳一路聽我呻不停安慰我, 為我打氣

今日仲特登請假嚟參加我畢業禮, 只有好姐妹先願意犧牲D假期去陪我

除左東外, 你就係第2個對我不離不棄既人喇

我只能夠話希望下世你依然係我好姐妹/好兄弟

我手上咁靚扎花都係Ella送比我架, 仲搵左我結婚時幫我整花球果個人整架

佢D花真係好啱我心意, 呢紥花我超級鍾意

人逢喜事精神爽, 呢張相好似有個光環罩住我呀

租住件袍就唔好蝕, 之後既禮拜日就去左迪欣湖影相

另一位好姐妹阿文出場喇

我人緣一向差差地, 無乜朋友, 但好慶幸有2位好姐妹在旁

今日阿文仲用新look見我地, 好靚女呀😍 最喜歡你呢個髮型

我地又去左數碼港影相啦, 今次係family photo

2哥仲特登帶埋佢Master畢業袍出嚟一齊影, 我們這一家有2個大學生了

少不了放閃相