9 Oct 2017 - Mon -
Day 3 - 箱根 → 大涌谷 → 蘆之湖海盜船 → 酒店懷石料理
去箱根車程耐又貴...好彩出發前用僅餘時間在Klook買箱根周遊券(2日)
大概HKD 345就有新宿往箱根來回車飛 (浪漫特急需另加錢) + 箱根市內交通任搭
包括登山鐵路 / 空中纜車 / 海賊船 / 登山巴士等等......所以呢張券係去箱根必買
不過要留意返換票地點同時間，要去到新宿站西口既服務處換領 (箱根周遊券詳情)
通常長途車我都會買幾個飯糰, 瞓醒就食, 食飽又瞓, 養豬咁養
呢個飯糰勁呀......成隻蛋喺入面😆
搭左成2個鐘頭車終於嚟到呢個箱根湯本駅
落車後第1個景點唔洗諗一定係廁所😆
免卻嚟既時候搭長途車既痛苦...我地決定加錢換回程搭浪漫特快號列車...快好多同舒服好多
酒店有接駁車接送，由於指示唔清晰，我地兜左2圈先搵到個車站
撞鬼....楝個雪糕筒就係個車站...睇鬼到咩😒
日本D野真係千奇百趣.....真係有人駕四軀車
我地book左箱根湯本溫泉酒店 (Hotel Okada)
$5336/晚 (包房內晚餐), 位置唔太方便, 距離車站較遠, 每次都要靠酒店接駁車, 仲要每人¥100
班次有限制...所以有點浪費時間...我地有5人..如果搭的士都突左1個出嚟
所以下次去箱根都係揀返D可以由車站行去既酒店
放低行李喺酒店就落返箱根湯本駅搭箱根登山電車到強羅站
我地喺箱根湯本駅入閘後有間cake shop....買左呢個雞蛋布甸+卷蛋...超勁好味
買完之後先發現箱根周遊券有D cash coupon可以用...不過唔怕...我地臨走前再去買多次
結果唔洗錢可以買多個卷蛋同埋幾個布甸
中間果個就係傳說中好好食既卷蛋...入面d cream雪到好似雪糕既口感架
到強羅後再搭呢架纜車上早雲山
沿途風景好靚
要到大涌谷就要搭吊車.....有時太大風吊車會停駛...可改搭登山巴士
但當然景觀無吊車咁震憾啦
到左大涌谷呢個位就會知道搭吊車既可貴
因為只有吊車先可望到呢個場面....媽咪見到勁興奮勁開心....不停話好靚
大涌谷係自然奇觀, 40萬年前火山爆發後就留低呢個火山口遺跡
黃色果D就係硫磺, 山坡上依然係噴出熱辣辣既水蒸氣
冬天嚟就睇唔到呢個場景....但就睇到一地雪景....各有各特色
現場勁濃烈硫磺味
上吊車時會派濕紙巾比你...為免吸入大量硫磺....都係保護自己好D
各人都擺同一個pose....但出嚟既效果好唔同
我賣緊洗頭水廣告
東賣緊服裝廣告...Guess代言人😆
我哥賣緊底衫廣告😝
媽咪搞笑語錄: 好靚呀呢到...點解會有呢個自然災害既?
我: ......呢個係自然景觀....唔係災害😐
呢到最出名就係水煮黑玉子, 黑色蛋殼係因為泉水中既硫磺與鍋中既鐵質結合而成
當地人仲話食1隻可延壽7年
我要繼續保護自己, 戴返濕紙巾😷, 但我戴到好似偷蛋賊咁
跟住我地搭返吊車去第2個景點 - 盧之湖
好好彩趕到搭最後一班海盜船
畫面一跳已經返到酒店....間房好大呀
5人房有可以開到5張塌塌米
瞓唔到塌塌米都唔怕...仲有1間房係2張西式單人床
媽好偉大咁讓間房比我同東......但其實.....我地想瞓塌塌米😐
2個白痴不停扮Doraemon瞓櫃😆
Check-in時已講定7點食飯....點知真係好準時...我地因為塞車仲爭D遲到
話咁快已擺到成枱都係
真係超正....玩完咁攰.....仲可以喺房內食飯...有人開埋枱執埋
食完就可以叫佢上甜品....真係超飽
佢執晒野後就會有專人幫你鋪塌塌米
我地休息一陣換好衫就去浸溫泉喇
東叫我爸擺個pose想點😒 山口組根哥嗎?
我扮緊藝妓跳舞😂
大家各自各去浸溫泉...第一次除晒衫浸....醜死鬼
我不停用毛巾遮住自己行....落到水後就不停望人😂
酒店附近都唔會有7仔....我地喺返酒店前買定D杯麵以備不時之需
所以今晚東既宵夜就有山頭火拉麵啦
留言
張貼留言