2017的聖誕節假如何渡過?

又到聖誕節即代表2017將近尾聲了

2017可以話係我最辛苦, 但收獲最豐富既1年, 所有人生大事都集中晒喺2017

好希望2018既日子好過D啦...皮膚又好返D啦...荷包又腫脹D啦

今篇嚟到聖誕大集會

本來諗住有4日假可以休息下...執下行李咁...但日日都好充實

同埋我既staff discount將近尾聲, 搞到我日日都要落去巡鋪

23號去左打2個鐘羽毛球後就陪朋友去巡鋪, 返到屋企已經無左成日時間

拿拿臨整定啫喱糖準備聽晚開party用

跟住就同老公入去沙田睇燈飾

年年沙田既空中花園都好落本, 佈置得好靚好夢幻, 沙田已成為我聖誕必去既地方

今年主題係粉紅遊樂園....周圍都係粉紅色....點影都靚

24 Dec 2017 - Sun -

今日同一班好友喺寒舍開party

我地無一早約定, 只係佢地入開嚟青衣巡鋪

我又好隨意咁話不如喺我屋企食埋野先走, 然後又無啦啦有3位朋友突然加入

咁就造就左呢個party喇

老公好抵錫...幫手楂橙汁招呼朋友

好多時我會喺一D細微之處睇到1個人既性格係點...有D野唔相處過係唔會睇得出

暫時我都覺得我嫁到個好好既老公

因為佢無因為好想打switch而忽略喺廚房忙緊既我, 好主動入嚟幫我煎雞翼

食飽又堅持洗埋碗先玩, 就算我不停叫佢出去玩唔洗入嚟幫手佢都唔肯

其實我真心想佢出去玩架, 因為我覺得男人喺出面招呼朋友都好正常,

更何況佢好想買部switch但比我拒絕左, 咁難得Ella帶部機嚟, 我梗係想佢玩番夠本啦