10 Mar 2018 - Sat -
呢排天氣超好.....有猛烈既陽光但天氣清涼....呢D天氣行山一流
有大好既出汗機會, 我當然唔會放過2寶啦, 係時候捉佢地做下運動喇
今日我揀左由小西灣出發去大浪灣, 本來諗住行龍脊, 因為行過一次覺得好靚, 所以好想帶2寶去睇下, 點知搵唔到指示牌, 又唔夠時間上網做足功課, 結果無行到 😆
激鬼死~~~嘥左咁好天既機會
§
§
§
我地由南灣半島出發, 經海濱公園會有呢條樓梯, 呢到就係起步點
今日曬成咁, 2寶行完呢條樓梯後已經除晒褸
上左一小段樓梯會有分叉路, 向左行會見到呢間小型觀音廟
好彩我早有準備, 拎定2支拐杖比2寶, 雖然呢段係平路, 但對佢地嚟講都有少少吃力
我地每次見到有涼亭都會坐喺到抖下, 又順便欣賞下景色咁啦
除左見到小西灣及柴灣景觀外, 仲可以睇到對面海既將軍澳
第1次的迷失就發生喺呢到, 我地由左邊條路上嚟去到頭先個涼亭休息
然後我向右行一路落山, 我都覺得有D奇怪, 印象中無行過呢段路
再望下左邊見到有人拜山 😒 啋.....我行左去哥連臣角墳場
我中途截停左踩單車人仕問路 (搞到佢要急停添), 佢指返我地頭先涼亭方向
我地差唔多到涼亭時佢再次喺後面出現再指示我地正確方向 (實在太好人喇)
原來我地喺左邊上嚟時U turn去家父果個方向就係啦...真白痴....行左1大段冤枉路
呢段路係最辛苦既一段, 沿路都係樓梯, 又無樹蔭遮太陽, 如果唔係keep住有風都幾辛苦
一開頭準備上樓梯時見到野豬喺我地面前好敏捷咁行過
好驚呀!! 第1次見到實物, 平時只係新聞先見到之嘛!! 原來真係好大隻架!!
幾鬼驚佢會衝過嚟撞到我飛起
望返後面又係一片靚景色
行左一段樓梯後爸媽頂唔順了, 我地要坐低抖下食D野補充體力
我諗就係呢個關鍵位迷失第2次, 作死咩....有3條路...無1條寫去龍脊
阿爸無啦啦問人大浪灣邊個方向, 果個人指左中間果條, 就係咁, 我地輕易地錯過左龍脊喇
到底邊條路可以經龍脊我到而家仲未知 😒
錯有錯著....如果真係行龍脊我驚2寶頂唔順行唔返落山, 呢段路睇下大浪灣景色都一樣咁正
左下角係哥連臣角監獄, 而眼前綠色1小片果到就係石澳哥爾夫球場
到大浪灣喇, 大家都停低腳步欣賞下涼風與美景先
輕易完成旅程, 不過下次都係唔好揀呢段路喇, 對2寶嚟講比較吃力
途中經過法定古蹟 - 大浪灣石刻 -
估計係三千年前先民所刻鑿, 有鎮海護航之意
我地行到意猶未盡, 再由大浪灣行半個鐘去石澳, 沿路都係行馬路
可以近距離望到有錢人打golf...原來有錢人生活係咁既
之後帶2寶去出晒名影PW既藍色小橋
媽咪好後生已經周圍去玩, 石澳去過無數次, 但諗左好耐都唔知邊到係藍色小橋
點知一嚟到佢就話 "喜...乜係呢條橋呀....好耐啦...以前唔係藍色架"
咁我識佢果陣已經係藍色....我知鬼佢以前咩色咩 😐
媽咪即刻好興奮咁帶我去睇麵包石
媽: 嗱!! 呢舊就係麵包石喇
我: ..........哦
睇雲睇石呢家野我真係唔及得佢, 想像力驚人, 每次佢形容既野我出盡奶力都想像唔到
今日天氣真係算清喇, 撇除空氣污染問題, 望到對面海D樓都算係咁
沿路上返樓梯我地就喺呢到等車, 唔好以為有小巴會上嚟載客, 我地係等緊1個人
有咩幸福得過行完山有個阿哥揸車到石澳接我地呢😎💕
留言
張貼留言