Ella在澳門大開眼界的生日之旅

24 Mar 2018 - Sat -

有日突然心血來潮想同2位閨蜜去澳門走轉, 一問之下原來呢2個港燦N世無去澳門

1個就話十幾年無去, 另1個話成廿年無去😵 雖然澳門無乜好玩姐, 但唔洗耐成咁呀

就係咁, 做就左我地369澳門遊, 順便同埋Ella慶祝佢出世

§
§
§

金光飛航有生日優惠, $258來回但只限買2套, 另外2套我地經工聯會買$260來回

好彩我無啦啦抽起條筋想晨早換左飛先, 我先發現工聯會係坐Turbojet

大家都唔想分開去既情況下唯有放棄坐金光飛航

因為Turbojet九龍出發既船唔多, 上晝有2班都爆左

我地只好揀12:00出發, 如果再過2日先換飛, 可能連12:00都無位喇

今日以為係超hea遊既1日, 但臨尾為左趕船真係趕頭趕命

呢次係我去咁多次澳門以嚟搭最多的士既1次 (其實只係我一向慳家甚少搭的士😜)

4個人去旅行既好處係啱啱好1架的士

多人去玩一定會食得多D野, 但同埋Ella去玩可以話係行到邊食到邊

羊群心理既我地見到呢檔野排長龍就梗係唔執輸啦

即整即食既咸蛋黃唔知咩餅, 嚟咁多次都未見過佢擺檔, $20包當然要買嚟試下啦

唔知係咪多人食熱鬧D開心D, 連塊餅都好味D, 熱辣辣好香口呀

我地唔會放過每分每秒既影相時間, 排隊買餅期間都要影一餐

澳門吸引之處在於好多街道及建築物都係1個影相位

之後我地碰下運氣去買我最喜愛既椰子雪糕

本來Ella企第一, 但一擰轉身知道要影相時即刻摩打腳走左去最後 😆

咁先可以展現出阿文咁優美既pose

呢杯椰子雪糕真係無得輸, 我每次嚟必食, 佢係用新鮮椰子肉打成汁再做雪糕的

所以啖啖都有好香甜既椰子味, 2位食完都激讚

我地沿路行返去大三巴, 途中見到靚景當然唔會放過啦

阿文充分表現出傭懶感

此乃到此一影景點

佢2個對上一次嚟可以係十幾廿年, 而家影定呢張相可以比佢地既十幾廿年後睇返

慳錢慳到盡既我地走返去永利搭shuttle bus去氹仔

永利門口有個大水池, 佢2個一路行一路鬧 😂

又話人地起咁Q大唔知做乜, 起泳池比人游水好過啦....blablabla...

呢2個港燦....人地有錢鍾意起乜都得啦....關你地鬼事咩 😆

之後我地去到氹仔既永利皇宮睇到O晒咀, 人地起左D吊車載人過去佢間酒店添呀

去酒店要搭吊車喎.....囂張到丫

去到威尼斯後特登帶佢地去影澳門巴黎塔

我個人嚟講真係覺得幾靚架, 夜晚仲靚呀, 個巴黎塔閃閃發光架

希望我下星期去巴黎都睇到巴黎鐵塔既夜景啦

到時我同老公要擺返同一個pose影相先...好期待呀💕

跟住我地就由澳門巴黎人果到搭的士去官也街, 車費只係$27, 4個人夾$7都唔洗, 快靚正

慳返D腳骨力就梗係比Ella橫掃官也街啦, 佢屋企人多勢眾, 手信都買左幾袋

點解香港都有鉅記但我地都要喺澳門買呢? 咁當然係澳門既鉅記真係好食D啦

澳門既鉅記喺澳門做, 但香港既鉅記係大陸做

澳門既鋪頭仲有D即場手做既鳳凰卷賣, 比起機做真係好食好多架

除左鉅記, 我地仲有幫襯晃記, 舊式老餅鋪, 價錢經濟過鉅記好多