2 Apr 2018 - Mon -
今日終於去見識下威尼斯, 唔係澳門果個呀, 係真既威尼斯呀
今日我地都總喺意大利, 而今晚就會去另一個國家奧地利, 1日踩2國係呢個trip常做既事
§
§
§
Day 4 - 聖馬可廣場→ 杜奇皇宮→ 嘆息橋→ 聖馬可大教堂→ 貢多拉(自費EUR30)→ 奧地利
嚟歐洲食左2朝西式早餐, 到今日真係唔想再食喇
好奇怪既炒蛋, D蛋漿溝左好多粉漿水, 肥淋淋既煙肉, 硬到咬崩牙既包😣
好彩出發果日買左幾個合味道, 都係杯麵好食D 😋
今日我地去到渡輪碼頭搭船去威尼斯
威尼斯係由118個大小島嶼組成, 再用400條小橋連貫, 運河就係主要既交通幹線
我: 呢到好多建築物都好似澳門呀
團友答: 係澳門好似佢下嘛 😐
我: 係喎係喎 😁
我地身後就係嘆息橋
橋上有2個窗, 係比囚犯同家人道別之用
身後就係杜奇皇宮 (點解咁有LV feel?)
聖馬可廣場
因為位於威尼斯地勢既最低點, 所以漲潮同落大雨時係首先水浸既地方
聖馬可大教堂
非常非常之靚既建築....好吸晴
一場嚟到, 當然要坐下威尼斯最出名既貢多拉船啦
船夫仲好鬼有型, 每次見我地舉機都擺pose
長長既船在狹窄既巷穿插真係好特別, 以前D人就係要靠住搭呢D船在島上生活
當下心情好relax, 好寫意, 所以有D船夫一路撐船一路唱歌
由窄窄既巷鑽出大海時真係好興奮, 我好似活喺童話世界咁呀
又1日sunshine day, 讓我地可以感受到威尼斯陽光下既美
好幸運遇上好玩既團友, 約定一齊搭船仔
導遊搞笑咁話呢條係一條血路, 非常之血腥, 仲叫女團友一定要痴實佢行
因為呢條街全部都係名店😁
我地又開始影自我感覺良好相
途經一間coffee shop, 嚟到意大利幾日都無食過Tiramisu, 咁出名無理由唔食架
雖然貴D, 但經餵食老公慫容下就買左
真係好好好好食架...佢D cream cheese口感似雪糕...finger bread浸滿香濃既酒同咖啡...正
今日午餐食意大利好出名既墨魚汁意粉, 如果唔鍾意可轉茄汁
一向都鍾意食墨汁既我當然唔會錯過啦, 真係超好食
仲有炸得好香脆既魷魚 蝦仔 同魚仔....呢餐真係無得頂
有好玩既團友係唔同D, 食墨汁指定動作
人地已經食緊, 我地仲不停影相 😁
威尼斯都有斜塔??
導遊話因為地勢令到個建築物斜左, 但個鐘樓一樣運作, 一樣有人入去, 所以無問題的
跟團另一好處係, 好奇既時候可以即刻發問, 有人解答
呢D玻璃糖就係威尼斯最出名既手工藝, 呢到出名整玻璃製品
初初導遊話玻璃糖我以為食得😆, 原來係擺設
跟住我地搭幾個鐘頭車去奧地利, 沿路風景超靚, 東見到雪山又開始興奮
我地嚟到奧地利喇, 小小既1個地方都靚成咁
呢到就係奧地利其中一個景點 - 金屋頂 -
以前D人為左炫富, 會特意打造用黃金做成既屋頂, 當然而家呢個已經唔係黃金啦
從來都無諗過會去到奧地利, 估唔到原來係1個咁靚既小鎮
是日晚餐 - 煎超咸豬扒配薯仔 -
呢到既煮食習慣落成斤鹽嗎?? 咁食法個腎真係頂唔順
食飽飽我地喺酒店附近散下步, 呢到好早就收鋪, 條街靜英英, 天寒地凍, 行一陣就返酒店了
呢條友扮緊相中型男
留言
張貼留言