4 Apr 2018 - Wed -
今日係萬眾期待 (萬咩眾丫, 得我地2個期待之嘛) 既1日, 就係要去位於英格堡既鐵力士雪山喇
好明顯我地無為過上雪山做足準備啦 😁
雪褲又無, 唔好話雪鞋, 連對厚底少少既鞋都無, 重點係手襪都無帶, 我地真係當行街 😂
今日係萬眾期待 (萬咩眾丫, 得我地2個期待之嘛) 既1日, 就係要去位於英格堡既鐵力士雪山喇
好明顯我地無為過上雪山做足準備啦 😁
雪褲又無, 唔好話雪鞋, 連對厚底少少既鞋都無, 重點係手襪都無帶, 我地真係當行街 😂
Day 6 - 英格堡高地 → 乘旋轉360度吊車 → 鐵力士峰 → 法國
去英格堡沿途既風景, 好係飄零燕入面既景色呀, 土地供應嚴重充足
一大遍雪地呀....望到都興奮 😍
去到時導遊話因為山上大風, 吊車唔開放
我地聽到勁O咀, 我搭左十幾個鐘飛機嚟, 比左皮幾野旅費, 你同我講無得上去???
我直情想洗出一招港女式殿地, 不過因為雪地太凍, 我無咁做 😫
呢個時候我知道只有1位幫到我....佢就係觀世音菩薩啦
我有乜事都搵佢架😂 喪唸 "南無大慈大悲救苦救難廣大靈感觀世音菩薩"
我冒住爆肺既風險, 好辛苦先嚟到瑞士架咋, 唔好比我有遺憾啦, 我地好想好想上雪山呀
暫時無得上唯有自娛住先啦, 如果真係無得上, 喺山腳玩雪當上左囉
出發前已經諗住喺瑞士寄postcard, 喺雪山上面寄寧舍有意思, 不過我凍到隻手僵晒寫唔到字
我又要重覆呢句喇 "觀世音菩薩係千處祈求千處應架"
吊車開放喇, 我地可以上山咯, 大家都好開心
吊車內都係自己既團友, 不停互相幫對方影相
即刻砌雪球先, 但撥左2野先發覺.........自己唔記得戴手襪 😭
白痴架....上雪山呀而家...明知玩雪架啦...連手襪都唔戴
凍到手指爭D要截肢咁滯
我決定放棄....叫身後其中一位小朋友整個雪球比我 😂
呢條友又發作喇..... 😒 硬係做埋D野唔怕失禮人
見到一大遍雪地, 我直情瞓身演出, 成個撻落去
Hello!! This is Apple!! Nice to meet you 😁
我仲走左上山坡, 玩小朋友們整既人造滑梯, sir到條牛仔褲濕晒😜
之後玩D更刺激既野, 就係sir呢個雪兜喇
超正.....好快咁sir落嚟, 我直情遞起2隻腳等佢sir快D呀!! 好好玩呀!! 😆
當老公興奮到跳起既時候, 不幸既消息又再降臨
本來我地要搭1架360度旋轉既吊車再上海拔一萬呎既鐵力士峰, 呢個係上雪山既高潮位
但導遊話因為山上太大風, 吊車停駛 😭 唯有食完個lunch再睇下點安排啦
唔洗諗啦....我又梗係急call觀世音菩薩啦
呢餐雪山上食既lunch係牛仔腸, 但唔食牛既我地可以轉雞塊, 搞到好似麥樂雞餐咁, 但幾好食喎
右邊果碗好值得一提, 佢就係傳說中沒有最咸 只有更咸既雞湯
我飲落又覺得唔錯喎, 當自己食緊滴雞精
當食到甜品時導遊就宣佈吊車重開啦~ 我地即刻拿拿臨去埋個洗手間就衝去排隊上山
我地就係搭呢個最出名既360旋轉吊車上到最頂
如果無得去真係好可惜呀
搭呢架吊車可以飽覽阿爾卑斯山脈, 完完全全感覺到D冰川氣勢磅礡
喺山下既時候唔明點解話山上好大風要吊車停駛, 但見到呢個場面就明喇
吹到地下D雪都飛起晒
無論點影相, 都唔會及得上親眼見到咁震憾
我地終於嚟到喇....好感動!! 真係好驚無機會上到嚟感受下呀
呢到唔止大風, 仲好跣, 見到有好多人行呢個位都跣倒呀, 我地都好小心咁行
實在太凍太凍太凍, 行出少少已經頂唔順, 重點係我地對鞋無準備, 好驚跣低拗柴
所以行左出去感受一下雪山既威力就返入室內喇
雖然好凍, D雪又吹到打晒落塊臉到, 但都係一個好難忘好令人回味既一日😄
玩完瑞士後我地就要去另一個國家~~ 法國喇
由於車程太遠, 所以會喺法國既桑本停留一晚先再去巴黎
之前長途車既油站都有免費洗手間, 但呢程車就無喇, 去洗手間要經過呢個位比錢
呢到好似比EUR 1, 佢會出返張receipt比你可以喺呢個商場買野用
咁當然你係無可能搵到EUR1 既野啦, 唔想蝕既咪貼少少錢消費囉
都話歐洲人高大係有原因既, 呢塊Lindt都大過人
我地進入法國範圍就見到堆雨雲喇, 準備落大雨喇!! 搞乜鬼歐洲既雨雲都寧捨靚過人既姐
留言
張貼留言