顏氏宗親11人北九州之旅 (Day 2/5)

26 Jul 2018 - Thu -

Day 2 - 博多 > 別府九州自然動物園 > Dinner

本來今日既景點有2個, 去動物園 + 別府地獄, 明明計過車程同遊覽時間應該足夠架

但千算萬算都算唔到攞車用左成個鐘

我地已經預算08:30去攞車, 諗住半個鐘乜都搞得掂, 點知成個過程搞到10:00 😣

只能夠話.....香港人做野又快又有效率姐 😆....唔關人地事既

§
§
§

今朝食個飯糰做早餐就出發, 日本便利店買既飯糰真係好好食





我地租左8人+5人車, 呢幾日就靠晒你地喇 😉

做乜2架車既色都係揀返同你地香港架車一樣既 😂

由博多去別府車程要2個鐘, 做司機都幾攰, 輪流開車會好D喇

我好珍惜坐5人車既時間, 繼續睇落去就知咩事...





今日個天超藍代表住咩丫?? 熱到溶囉

由於有老有嫩關係, 去到別府灣都要停一停站去洗手間, 再食下雪糕

就係因為呢個中途站, 我被騎劫左去白色車😢
後面果3隻野全程好鬼嘈, 呢個旅程我到底可以避到幾多次....我好想痴住老公坐呀 😭

見到呢隻大象就知道我地已經到左九州自然動物園喇






我無整國際牌, 所以只可以偷雞喺園內停車場過,下癮

好鍾意老公整呢張合成相, 好似佢永遠都喺我背後守護我咁呀💕





最後搞到12:30先入到園, 仲要Jungle bus 15:00先有位

咁多時間唯有喺園內玩下啦

呢到有得比小朋友騎馬仔






Liz & Kobe乜都唔驚, 乜都夠膽玩, 騎馬當然無有怕啦








E姐能夠影到呢張合照同隻馬既距離已經係極限 😆






最驚動物果1大1細已經企左喺遠離隻馬最遠既地方😂
咁大棚人影張正常合照都好困難, 呢張家母掛住驚隻馬掂到佢無望鏡頭 😐





而呢張昕又掛住望隻馬又失敗左 😐






Liz & Kobe一向大膽, 餵馬對佢地嚟講直情好玩啦





乜都驚一餐既昕餵馬對佢嚟講係一場劍擊 😆

企到遠一遠, 又不停縮, 馬仔食到佢條蘿蔔都覺得吃力






跟住我地去左公園既最遠處睇其他動物, Kobe用虫虫餵緊金絲猴







其他館仲有唔同既小動物睇

呢隻咪丁滿囉










仲可以戴手套摸兔仔

最興奮當然係2個大膽王啦









玩到咁上下就落返去下面食野喇

呢間餐廳有中文menu, 亦都有啱小朋友既食物, 都好好味架






終於到我地喇

準備上Jungle bus餵動物了, 佢地期待左好耐喇, 呢個景點亦係成個旅程既重點








3個人share 1盤食物, 唔通擔心D動物食得太飽, 以免其他旅客無得餵食??





雖然天氣好熱, 但無損佢地興奮既心情

不過一開車就有涼風, 所以就算喺個籠入面都唔焗唔熱






一開始會先餵D好溫和既動物





當然唔係用手餵啦😆 用長夾架








跟住就會進入猛獸區

人生第1次咁近距離接近猛獸咋












太多相不能盡錄, post幾張算啦






之後去同獅子BB影相






但咁啱輪到我地影時獅子BB要Go home啦, 所以比出世1個月既老虎BB我地影

Go home呢個term係職員姐姐講架!! 佢地抱走獅子BB時Kobe無啦啦用國語問人

Kobe: 獅子去哪裏? 姐姐就答佢Go home

唔知Kobe係咪認為人地唔識聽廣東話就一定識聽國語呢 😐





大合照

抱抱小老虎呢個環節本來3個豆丁都要爭抱, 但因為老虎BB得1個月大, 只可以比大人抱

所以呢個重任當然交比爺爺啦, 結果3個都無得爭 😆





今日既行程就此完結

每處停留咁耐, 成村人又周圍影下相, 只係1個景點都玩左幾個鐘

問返佢地最難忘係邊個景點, 佢地都一致投選動物園, 果然餵動物真係好吸引

唔止小朋友, 連大人們都好high架






 我地今晚住呢間别府灣皇家酒店係成個trip最靚最大既1間

因為我早book有early bird優惠, 暑假價 $784/晚包自助早餐








酒店房望出去既view

酒店附近都無食肆, 好彩我地有車, 可以出去別府駅附近開餐

今晚好想食串燒, 見附近有呢間居酒屋, 又有房容納我地, 唔洗諗..就呢間

咁啱有2個香港人食完行出嚟, 話強烈推介呢間, 好食又抵食

當然食完之後我都會強推....11人埋單大概2K...真係算唔錯喎

無飯不歡既家母當然要嗌個飯糰比佢浪下個胃啦






除左飯糰, 呢到仲有雞肉飯, 所以啱晒家母同班豆丁

串燒有鹽燒同汁燒2款, 我地一律揀晒鹽燒, 非常之乾身香口, 真係好好食呀

大食既我地當然仲會encore啦

呢個刺身船真係無得輸, 件件都咁好食, 肉質鮮嫩滑口

小朋友們食飽後就又唱又跳, 一路食串燒, 佢地一路娛樂我地 (其實嘈到拆天😔)

呢3條佬食飽就食雞😐, 呢幾日晚晚都食幾鋪先返房