北海道2人世界死好命遇上櫻花滿開之旅 (Day 2/9)

28 Apr 2019 - Sun -

Day 2 - 札幌 → 函館 (金森紅磚倉庫 /  函館明治館 / 函館啤酒館 / うにむらかみ海膽餐廳)


本來原定搭8點幾既特急去函館, 但尋日買pass劃位時已經無晒指定席, 所以要搭9點幾果班

所以買pass有樣好, 佢可以預先幫你劃晒指定席, 知道無位就揀另一班次

唔洗當日去到先知無位而浪費時間

因為去函館車程要4小時, 我地今朝喺family mark買定飯糰同我最愛既蘋果汁喺車上食

仲有買多盒車站內既壽司便當, 以防我個大食老公肚餓






無論喺月台或閘外都有好多呢D小食亭買便當, 價錢都係一樣



坐長途車一定要買指定席, 如果揀自由席, 可能無位坐要企4個鐘

仲要顧及你件行李呢...所以千祈唔好慳呀

(札幌往函館車資5720 yen, 指定席加3110 yen)



一開車我已經急不及待開盒便當食, 初初都諗住車站便當好食極有限

但原來我錯喇......係好好食架!! 爭D想獨吞唔比老公食




瞓陣覺已經到函館喇!! 呢到既環境好靚好寧靜, 同之前去日本其他地方好大分別

再加上而家天氣凍, 好多樹都未長出樹葉, 增添一份淒美感




函館住宿: 函館皇家酒店 (Hotel Hakodate Royal)

距離函館站大概10 mins路程, 跟住Google行好易搵

雖然比起其他酒店遠左少少, 但勝在近海, 有D房可以望到無敵海景

我地咁啱都望到少少海景, 房內非常大, 好舒服, 洗手間都唔細架

日本黃金週呢段時間大概$1400/晚

函館D酒店呢期好爆, 大部份都好貴, 有D去到$5xxx/晚, 好彩我仲book到呢間酒店






函館市內主要係靠巴士或者呢架市電去各大景點

函館站附近有市電一日遊券買, 如果1日內去到3個景點就已經抵左

不過今日我地只去1個景點, 所以唔洗買




上車時記得喺門口攞呢張飛仔, 對應返你喺第幾個站上車

落車時望返價錢牌就知你要比幾多錢, 呢張飛連同車資入落箱到就得

如果你唔夠coins都唔怕, 車頭司機位隔離有部自動唱錢機, 非常方便





往金森紅磚倉庫方法: 函館市電(往湯之川方向)至【松風町】下車行5 mins

天氣雖然凍, 但好好陽光, 真係好舒服呀





每個倉庫內都有唔同既精品 / 擺設 / 手信 / 食物等等






見到呢身裝扮就覺得好啱老公....果然無遺和感😆 呢個look好襯佢






每次去日本見到都會好想食既雪糕pancake






淨係望個樣都覺得好吸引既燒餅









影左相當買左 😆






今日最期待既一餐, 喺函館最出名既海膽專門店

我地見距離開門時間仲有45 mins, 所以就周圍行下先

不過周圍都無野行架, 因為呢到係函館朝市, 好多鋪頭只做上晝





點知45 mins後返嚟就見到有條人龍....作死咯....早知唔行開啦





原來門口個餐牌已經寫左預約席已滿, 好多日本人都會嚟食呢間, 所以佢地一早預約左

初初問個侍應要等幾耐, 佢話要2個鐘😨

本來都想走, 但諗諗下2個鐘後都只係7點, 仲好早丫, 咁照等啦

好彩排前面個日本人識國語, 佢話預1個鐘就OK, 因為日本人係會講多唔會講少

結果我地真係等1個鐘就食得....好彩無比個侍應拋窒姐~~





呢間野有D貴貴地...1碗海膽飯要$3xx





老公鍾意食魚子, 呢碗海膽魚子飯要$270

但D海膽真係非常鮮甜.....值得一試





我地仲叫左個熱食海膽飯, 芝士燒海膽同埋海膽薯餅

呢餐好貴, 不過真係好滿足, 可以食到咁多海膽 😍





都話每日宵夜係指定動作咯

本來諗住7點幾食完飯再夜D會肚餓, 但我真係仲好飽, 食左個蘋果已經唔想再食喇

個撈麵留返第日啦