呢個blog荒廢左5個月! 終於肯重出江湖喇!
其實我依然好鍾意寫blog，鍾意睇返自己既過去，每一個經歷都係幫助我成長，尤其係我即將有另一個身份😁 就係我要做人媽媽喇❤ 好快就由兩口子變三人行了👪
希望我日後仲有時間寫blog，可以記低小東既成長片段啦~~
小東可以話得來不易，亦可以話好容易! 相比起一擊即中既人咪得來不易囉，因為經歷過呢個艱巨既製造過程先知能夠成功懷孕真係絕非易事!
但如果相比起努力左以年計以上既人，仲要用盡好多方法，e.g. IVF, IUI etc. 先成功甚至未成功，小東的確只花幾個月就形成，咁都算係容易既!
天真的我以為一做就會懷孕，所以一直都遲遲未開工，諗住婚後用1年時間去多D旅行，去埋個歐遊先開始計劃! 如果比我再揀過，我會豪不猶豫咁選擇婚後即刻開工，唔想再浪費時間!
我由2018年7月去埋個family trip後開始努力，每月既期待 → 努力 → 等候 → 失望 → 然後再期待 → 再失望，呢個過程同心情輪迴左幾個月，當中食白果既滋味並唔好受 😢
再加上自己唔識，唔知咩係排卵期，試左2個月都唔得就開始焦急喇! 再加上我係1個無乜耐性既人啦，所以已經覺得點解想有個B都咁難呢? 上網不停做research，仲一度懷疑係咪自己個子宮有事，跟住就走去睇醫生照下啦，知道無事都還好! 咁究竟咩問題咁耐都無呢?
我想喺到分享下我用過既方法 😃
排卵試紙 (紅D)
備孕中既大家對紅D唔會陌生，我用左6個月，只有頭1個月有深粗綫，其他5個月都無，每個月只能用明日既線對比昨日既線先知已經係比較深色，所以每次都無喺深粗日開工，有時隊友身體狀況唔理想，都唔能夠翌日開工!
~ 每次用紅D之前2個鐘都唔可以飲得多水，我係1個每日飲超過8杯水既人，2個鐘內飲咁少水對我嚟講係勁辛苦
~ 當我check到條線深色過尋日時又會諗係咪已經深粗?
到底今晚開唔開工?
結果隊友當晚配合唔到我就會好唔開心...甚至想喊，因為1個月只有1次卵子受精既機會! 錯過左就要等下個月，我無乜時間浪費了 😠
~ 如果淺色過尋日，我又會諗係咪又錯過左黃金機會?
呢D其實都係壓力來源之一!! 最後...我決定唔再用紅D check，結果喺果個月就成功左!
所以我覺得無需對紅D既結果咁緊張，可以用2-3個月時間觀察下條紅線通常出現喺邊幾日，從而得知自己排卵狀況!
因為每人體質唔同，有人可能14日先深粗，但有人可能第9日。
基礎體溫
對我嚟講唔可以作準，因為我日日既基礎體溫都好高，嘗試過量到低溫果晚就開工，結果都係唔成功，所以都係因人而異。
隔日開工法
自從用紅D得知自己有機會第9日至14日都有線後，我就採取第9日開始隔日開工法，做到第21日，其實中間第11日無開工的!
最後….呢個月得左 😍
除左以上方法, 我仲有去蒸身/腳，睇中醫，飲滴雞精去調理身體!
無話邊個方法一定得，但我地一心準備做人媽媽既就要有永不放棄精神!!
留言
張貼留言